„ВО ВОРТЕКСОТ НА ОСТВАРЕНИТЕ ЖЕЛБИ“ ВО ПРОДАЖБА ОД 1 СЕПТЕМВРИ!

Нова книга од креаторката на позитивната енергија

„ВО ВОРТЕКСОТ НА ОСТВАРЕНИТЕ ЖЕЛБИ“ – ВО ПРОДАЖБА ОД 1 СЕПТЕМВРИ!

24 август 2017, Скопје – Издавачката куќа „Антолог“ од Скопје со огромно задоволство најавува дека наскоро излегува од печат и втората книга на Ана Бучевиќ – Во вортексот на остварените желби. Книгата од 1 септември ќе биде во продажба во книжарницата на „Антолог“ и во електронската книжарница на old.antolog.mk. Преводот на македонски е на Марија Саревска-Тодоровска.

„Знаеме ли кои сме всушност? И што е животот? Кога ќе се потсетиме на еден закон на кој заборавиле да нѐ научат во училиште, сѐ добива сосема поинаква смисла. Тоа е Законот на привлекувањето, кој е тука и дејствува. Секогаш. Само е прашање дали сме свесни за тоа. Сите сме креатори на сопствените животи, само некои ги креираат свесно, а некои несвесно. Сите ја имаме добиено дарбата со која ќе знаеме дали сме на добриот пат или малку сме скршнале од него. Таа добиена дарба се нашите емоции. Тие се наш водич и показател на нашите мисли, кои се креативни. Емоциите ни зборуваат какви ни се мислите и што ќе привлечеме во својот живот.

Постојат алатки и методи што може да ги искористиме за животот да ни добие сосема друга смисла, зашто ќе почнат да се случуваат ЧУДА! Чудата се основа на животот! И, ако во вашиот живот не се случуваат чуда, некаде грешите. Можете да привлечете пари, здравје, љубов, изобилство и среќа... Можете да бидете и да имате сѐ што ќе посакате зашто и сте дошле на овој свет за да искусите кои сте навистина – креатори на сопствената стварност!“, вели за книгата Ана Бучевиќ.

Книгата Во вортексот на остварените желби – Креирајте ја сопствената стварност со помош на Законот на привлекувањето и станете сведок на чудата во својот живот ќе ви помогне да откриете техники со чија помош ќе привлечете среќа и изобилство.

Вортексот, за кој Ана Бучевиќ пишува и зборува толку често, е вител на енергија во кој се наоѓаат сите желби и соништа на една личност. Авторката им порачува на читателите дека се на овој свет за да бидат среќни, задоволни и исполнети, а емоциите се тие што им кажуваат дали се наоѓаат на добриот пат или не го привлекуваат она што го посакуваат. Врз основа на своето животно искуство и на многубројните работилници што ги одржала на оваа тема, Бучевиќ на читателите им нуди методи и одговори како да ја креираат својата стварност.

На крајот на книгата се наоѓаат и сведоштва на луѓе што зборуваат за тоа како Законот на привлекувањето дејствува во нивните животи.

Ана Бучевиќ е родена во 1978 година во Сплит. Мајка е на дванаесетгодишната Ани и на двегодишниот Лукас. Во 2003 година дипломирала на Природно-математичкиот факултет во Сплит, Хрватска, а по занимање е професор по кинезиологија. Свесна дека да се биде професор значи да се биде и воспитувач, а и свесна за важноста на емоционалната интелигенција за среќен и успешен живот, во 2009 година се насочила на развојот на тој вид интелигенција кај децата и истата година започнала соработка со приватно основно училиште, како и со Центарот за личен развој, во кој го почнува проектот „Сафари на духот“, одобрен од Министерството за образование, наука и спорт на Република Хрватска. Две години работела како уредничка и водителка на едукативната телевизиска емисија „Сафари на духот“ на регионалната телевизија. Пишувала колумни за неколку хрватски портали.

Во 2011 година ја објавила Сафари на духот, која воедно е и најпродаваната книга за воспитувањето во Хрватска. Во 2012 година почнала активно да работи како мотивациски говорник со цел да ја подигне свеста за дејството на Законот на привлекувањето врз животот на поединците, т.е. да ги потсети луѓето на нивната способност за креирање на сопствениот живот. Досега одржала преку 30 семинари во целиот регион и мотивиралa илјадници луѓе, кои најдобро сведочат за успешноста на нејзината работа.

Во 2015 година jа издала својата втора книга, Во вортексот на остварените желби, која исто така стана бестселер. Во 2015 година станала и коосновач за Хрватска на академијата „BigU“, меѓународна едукациска онлајн-платформа со најпознатите светски предавачи на подрачјето на деловниот и личниот развој. Во 2017 година jа издала својата трета книга, Што (не) е љубов.

Ана Бучевиќ е активна и на каналот „Сафари на духот“ на „Јутујуб“, на кој речиси секојдневно објавува мотивациски видеа. Каналот во моментов брои преку 17 милиони прегледи.