3. ЛЕТЕН САЕМ НА КНИГАТА

„Антолог“ со многу изненадувања за претстојното лето

НАПРАВИ СИ КОКТЕЛ ПО СОПСТВЕН ВКУС НА 3. ЛЕТЕН САЕМ НА КНИГА ВО „АНТОЛОГ“

13 јуни 2017, Скопје – Издавачката куќа „Антолог“ од Скопје со особено задоволство го најавува третиот Летен саем на книгата, кој ќе трае цело лето. Под мотото „Направи си коктел од книги по сопствен вкус и уживај во големите попусти и во уникатните подароци“, „Антолог“ приреди многубројни изненадувања за да им го разубави летото на своите читатели.

„Ова лето на читателите им нудиме можност сами да си направат ’коктел‘ од наслови по сопствен избор, а во зависност од висината на сметката, ќе добијат соодветен попуст и дополнителни подароци од нас. Коктелите потсетуваат на плажа, на лето, на уживање, а ако сето тоа е збогатено и со омилените книги и автори, на задоволството му нема крај“, велат од „Антолог“.

Така, секој купувач во Книжевен центар „Антолог“ ова лето ќе добие:

-     за сметка од 400 до 600 ден. – 10% попуст и можност да одбере на подарок магнетен бележник или подлошки за шолја/чаша;

-     за сметка од 600 до 800 ден. – 15% попуст и подарок тефтер или шолја;

-     за сметка над 800 ден. – 20% попуст и подарок торба за плажа;

-     за секој купувач ќе има и – подарок моливче за испишување убави моменти.

Акцијата важи само во просториите на Книжевен центар „Антолог“ на ул. „Ѓорѓи Пулевски“ бр. 29 лок. 1, а се однесува на сите книги според редовната ценовна понуда. Количините се ограничени.

Избор за најкреативна фотографија #антологџии

Традиционално и ова лето „Антолог“ ја избира најубавата летна фотографија. Во овој конкурс учествуваат сите што ќе споделат креативни фотографии со книгите на „Антолог“ користејќи го хаштагот #антологџии и/ли #антологџики, а победничката фотографија ќе добие награда од „Антолог“.  

Богата агенда на активности

Покрај Летниот саем на книгата во Книжевниот центар „Антолог“, оваа издавачка куќа годинава учествува и на летните саеми во организација на Македонската асоцијација на издавачи, со попусти од 20% до 70%, како и со специјалната понуда на голем број наслови по неверојатно намалена цена од само 100 денари. Веќе завршија саемите во „Рамстор мол“ и во „Сити мол“, а следуваат оние во „Капитол мол“ (14-18 јуни), како и во Прилеп (13-17 јуни) и во Гевгелија (21-25 јуни).

Со намалени цени и со голем избор на наслови „Антолог“ ќе учествува и на четвртото издание на најголемата продажна изложба за уметност и дизајн во Македонија – „Паратисима“, која ќе се одржи од 15 до 17 јуни во Младинскиот културен центар во Скопје. А во соработка со „Купи книга“, ова лето ќе добијат подароци од „Антолог“ и сите читатели што ќе купат книга од оваа издавачка куќа преку најпознатата електронска книжарница кај нас.

Промотивни настани

Пред самиот почеток на летото, покрај саемските активности, ќе бидат промовирани и две изданија на „Антолог“.

На 14 јуни, со почеток во 20:59 часот, во локалот „Ла кања“ во Старата скопска чаршија ќе биде промовиран одличниот епистоларен роман „Се гледаме наскоро. Е.“ од македонските автори Драгана Евтимова и Владимир Лукаш. Промотори на ова несекојдневно книжевно издание ќе бидат Светлана Камџијаш и Александар Прокопиев, а авторите ги повикуваат и сите идни гости на настанот да напишат писмо и да го испратат на epistorijanovi@gmail.com, за што ќе добијат и одговор. Најдобрите 5 преписки ќе бидат прочитани на промоцијата наместо извадоци од романот, со што ќе се создаде едно колективно книжевно дело.

Следниот ден, 15 јуни, со почеток во 17 часот, во Салата за седници при Филолошкиот факултет „Блаже Конески“ во Скопје ќе биде промовиран романот „Магионичар“ од полската писателка Магдалена Парис. „Магионичар“ е политички трилер во кој станува збор за операција во која Штази, во соработка со бугарските граничари, наредувала убиства на граѓани од Источна Германија што патувале преку Бугарија во времето на Железната завеса. Многу од ликовите во овој роман се вистинити. А некои од нив ја прочитале и книгата. Промотор на романот ќе биде Сашо Кокаланов, а настанот се организира во соработка со Филолошкиот факултет и со програмата „Креативна Европа“ на Европската Унија.

Сите овие настани најавуваат долго книжевно лето за љубителите на читањето.