Соопштение

СООПШТЕНИЕ

„Антолог“ – Скопје објавува

3 ДЕНА ФЕШТА

ВО НОВИОТ

КНИЖЕВЕН ЦЕНТАР „АНТОЛОГ“!

17 април 2015, Скопје - Издавачката куќа „Антолог“ од Скопје со гордост и задоволство објавува дека на ден 20 април 2015 година (понеделник) официјално ќе се отвори нашиот прв јавен простор во 16-годишното постоење. Книжевниот центар „Антолог“ на улица „Ѓорѓи Пулевски“ број 29 во Дебар Маало е замислен како изложбено-продажен салон во кој, освен книгите на „Антолог“, посетителите ќе може да присуствуваат и на различни настани од областа на културата и уметноста. Работните часови се од 10-18ч. Во чест на отворањето, „Антолог“, во првите 3 дена, 20-22 април (од понеделник- среда), ќе понуди попуст од 20-50% на сите изданија, а првите сто купувачи ќе добијат и подарок. Меѓу другото, во текот на овие денови свои книги ќе потпишуваат писателите за деца и возрасни од повеќе генерации: Велко Неделковски, Александар Кујунџиски, Наум Попески, Сузана В. Спасовска, Душко Крстевски, Анета Попова, Ѓоко Здравески, Исток Улчар, Сузи Тенева, Гаврило Миловановиќ, Ацо Гогов, Сотир Ристо, Димитри Соле Љубин, Андреј Ал-Асади, Стефан Велковски, Живко Грозданоски, Борис Митковски и други, а преведувачките ќе го споделат своето лично искуство за книгите што ги преведувале. „Можеби се прашувате од каде идејата да отвориме книжевен центар кој не е во строгиот центар на градот? Ако размислите, ќе заклучите дека токму најважните нешта во животот – мудроста, карактерот, љубовта, вистинскиот пријател, ретко ни биле на дофат на раката. Тоа е и нашата философија. Како кога на драгите луѓе им велите ’За тебе би отишол до крајот на светот!‘“ – вели Жарко Кујунџиски, главен и одговорен уредник на ова книгоиздателство. Дебар Маало е познато по градската култура, еснафите, веселите боеми, стилот, архитектурата на старите куќи... По близината до најголемиот парк во Македонија и до Универзалната сала. Ова старо скопско маало е најинспиративното парче од душата на градот. Токму затоа, децата и возрасните, тинејџерите и вечно младите, може да нè посетат во потрага по својата омилена приказна. Интимно и оригинално катче, кое во своето функционирање нуди внимателно одбрана листа на специјални настани и омилени книги. Вистинско место за бегство од метежот. Просторот е обмислен и реализиран во идејна соработка со архитектот Анета Попова.

Следете нè на:

Facebook

https://www.facebook.com/pages/Книжевен-центар-Антолог

Twitter

@Antolog_Books

Instagram

antolog_books

Youtube

https://www.youtube.com/channel/UCPMeZZYy8_NAAGJ4bUR3OeA

За „Антолог“

АНТОЛОГ – Скопје е книгоиздателство првпат основано на 7 јули 1999 година, од страна на македонскиот писател Александар Кујунџиски. Овој датум истовремено e формален почеток на една дамнешна бизнис-идеја, но и продолжение на една долга и разновидна уметничка традиција. Сè до 1903-тата година во семејното стебло на Кујунџиски се впишани неколку генерации златари-кујунџии, чии филигрански ракоделија денес се втопени во морето на креативниот гениј на македонскиот народ. Хуморот, сликарството, актерството, уметничката фотографија, исто така, се дел од меморијата и оставината на Кујунџиски. Но, Зборот е оној кој отсекогаш бил наша првична и основна инспирација. Зборот преточен во книжевност, belles-lettres...

Контакт „Aнтолог“

Валентина Костова

Извршен уредник

e-mail: kostova.antolog@gmail.com